How lang and dreary is the night

written in 1794

How lang and dreary is the night, When I am frae my dearie! I restless lie frae e'en to morn, Tho' I were ne'er sae weary. For O, her lanely nights are lang, And O, her dreams are eerie, And O, her widow'd heart is sair, That's absent frae her dearie! When I think on the lightsome days I spent wi' thee, my dearie, And now what seas between us roar, How can I be but eerie? For O, her lanely nights are lang, And O, her dreams are eerie, And O, her widow'd heart is sair, That's absent frae her dearie! How slow ye move, ye heavy hours! The joyless day how dreary! It was na sae ye glinted by, When I was wi' my dearie! For O, her lanely nights are lang, And O, her dreams are eerie, And O, her widow'd heart is sair, That's absent frae her dearie!